A educación é unha das bases da nosa sociedade. A formación das novas xeracións debe de ser unha das nosas prioridades e desde a Concellaría de Educación e Deporte queremos ofrecer un servizo transversal das dúas áreas e traballar desde distintos ámbitos, dado que non existe mellor investimento que o que se fai co noso capital humano.
Así pois, esta concellaría ponse ao servizo, non só dos centros educativos colaborando activamente coas súas direccións, senón tamén coas asociacións de nais e pais e co alumnado en xeral, pois traballando de xeito coordinado poderemos optimizar esforzos e recursos, así como axudar a resolver calquera incidencia ou consulta que poida xurdir; a prioridade é traballar en equipo e o traballo en conxunto influirá positivamente nas novas xeracións.
Do mesmo xeito, o traballo na área de deportes debe estar en sintonía a través da colaboración activa de todos os clubes do municipio e traballaremos para continuar facilitando as actividades deportivas que se realicen; somos conscientes de que o deporte non deixa de ser un importante nexo de unión interxeracional que, á súa vez, fomenta os hábitos de vida saudable, a creación de disciplinas de traballo e a cultura do esforzo, todos estes valores importantes que se deben adquirir na infancia pero que se continúan a desenvolver na vida adulta, axudándonos a levar unha vida máis activa.
 |
Rebeca MouriñoConcelleira delegada da área de Deporte, Educación e Xuventude |