A concellería de Normalización Lingüística xunto coa Asociación de Escritoras e Escritores en Lingua Galega conmemoran un ano máis o Día de Rosalía de Castro, co apoio do Centro Español de Derechos Reprográficos (CEDRO).
O Concello de Sada comezará a conmemorar o Día de Rosalía o venres 18 de febreiro coa programación da obra de "A Miña historia" de Trémola Teatro . A cita terá lugar ás 18:30 na Casa da Cultura Pintor Lloréns e será de balde aínda que será necesario retirar as entradas para a función
Seguirá a programación de actos o mércores 23 de febreiro coa lectura, por parte das concelleiras e concelleiros da Corporación, do manifesto do Día de Rosalía ás 12:00 horas na Praza de San Roque. O mesmo día e neste mesmo lugar prográmase unha hora de Lectura Libre entre as 17:00 e as 18:00 horas.
Ademáis durante todo o día 23 levarase a cabo a campaña "Agasalla un Libro e leva unha flor" coa participación da Librería López, o quisco Isabel, a librería Labarrosa, Carlín e Pequeño Tío. Por cada libro que compres o establecemento entregará unha flor. Desde 2010 a Asociación de Escritoras e Escritores en Lingua Galega propón á cidadanía que agasalle cun libro en galego e cunha flor ás amizades e persoas queridas, alén doutras accións que contan con grande aceptación e impulso por parte da sociedade, e moi especialmente polo sector educativo.
O lema escollido para este 2022 é: #SementadePensamentos
Manifesto da Asociación de Escritoras e Escritores en Lingua Galega no Día de Rosalía de Castro 2022
PENSAR [TE] LIBRE
Eu son libre. Nada pode conter a marcha dos meus pensamentos, e eles son a lei que rexe o meu destino.
Rosalía de Castro.
Alimentamos a realidade do noso País a través da nosa lingua e das palabras que envolven a nosa diversidade social e cultural. Pensármonos na lingua de nosoutras é manter, transmitir e dignificar quen somos. E esta é a forza que atopamos en Rosalía de Castro: recoñecérmonos como pobo forte, unido na nosa lingua.
Non hai nada máis poderoso que as voces legadas polas nosas devanceiras, para arrodear os sentires, as emocións, a rebeldía, a liberdade dese pensamento sobre o que ninguén pode mandar.
Velaquí o maior acto revolucionario que nos agasallou Rosalía de Castro! Os seus versos transfórmanse nunha historia que rebela, provoca, emociona e que nos acolle para “eu tamén navegar”, para facermos parte dunha nosa Historia propia e libre.
Así vou eu/formando parte/Non me abandono e formo parte , do pobo que describe Rosalía de Castro, da xente que defende a cultura sen cancelas e enche as rúas de voces violetas para combater da man das compañeiras os mouchos que nos asexan e a aqueles que ladran contra as que camiñan.
Abracemos, entón, a desorde das ideas e a marcha dos pensamentos para seguir o navegar de Rosalía de Castro na voz das persoas humildes, para escoitar o silencio das oprimidas e censurar as inxustizas coa forza da nosa lingua. Non precisamos mans alleas que escriban a nosa historia así que, Dálle que dálle ó argadelo/noite e día/e pensa e pensa naquelo/porfía que te porfía, porque xa agroma forte a semente plantada. Vivamos a galope nunha rede de afectos e celebremos que nin a lingua nin o pensamento se exilian. Tezamos xuntas, fortes e libres os puntos que calcetaron as mestras da República, as cigarreiras, as misteiras, as costureiras e todas as que, coma ti, loitaron contra as inxustizas e polos dereitos.
Cosamos cos fíos da lingua na que entendemos, debatemos, amamos e enliñemos as nosas ideas e os nosos pensamentos.
Tal com’as nubes
Qu’impele o vento
Y agora asombran, y agora alegran
Os espaços inmensos d’o ceo,
Así as ideas
Loucas qu’eu teño
As imaxes de multiples formas
D’estranas feituras, de cores incertos,
Agora asombran,
O fondo sin fondo d’o meu pensamento.
Beatriz Maceda Abeleira - Asociación de Escritoras e Escritores en Lingua Galega (AELG)