O DOG 212/bis (21/10/2020) vén de publicar as restricións que afectan a comunidade nos vindeiros 14 días. Resumimos as que afectan a nosa localidade.
Sada, 22 outubro 2020
Con cantas persoas me poderei reunir desde este xoves?
A partir do xoves 22/10 as reunións sociais quedan limitadas a un máximo de cinco persoas en toda Galicia.
Podo ir traballar, ao colexio ou á universidade con normalidade?
Si. Acudir a clase e ao traballo continuarase a facer en toda Galicia como até agora, sempre seguindo todas as medidas de prevención establecidas: máscara, distancia e lavado frecuente de mans. Tampouco será de aplicación nas actividades de formación regulada, as ocupacionais e as administrativas.
Até cando estarán tan limitados os contactos sociais?
Tanto o límite de reunións sociais como o resto de medidas adoptadas estarán en vigor durante 14 días.
Que máis limitacións existen?
A capacidade de comercios, restauración e lugares de culto quedan limitados ao 50 %. Un límite que aumenta até o 75 % nas terrazas. Ademais, está prohibido o consumo en barra. En canto ás vodas, os asistentes non poderán superar os 100 se se celebraren en exterior e os 50 en interior. Para enterros e velorios serán 25 persoas ao aire libre e 10 en espazos pechados. Os encontros deportivos poderán reunir a 150 espectadores ao aire libre e 60 en interior.
E o Feirón, como queda?
Sada celebrará o Feirón do sábado reducindo os postos ao 50%.