O Concello de Sada enviou ao ministerio de Asuntos Económicos e Transformación Dixital as referencias catastrais dos inmobles carentes de cobertura para que inclúan ditas zonas nos plans de cobertura.
A concellaría de Novas Tecnoloxías, xestionada por rebeca Mouriño, realizou nos últimos meses unha consulta pública, na que participaron 211 veciños e veciñas de Sada, para identificar zonas que non dispoñen de cobertura de fibra ou cobertura móbil.
Desde a concellaría explícase que a intención é que os resultados da mesma sexan estudados para a inclusión das devanditas zonas nos próximos plans de despregamento que leve a cabo o de Asuntos Económicos e Transformación Dixital.
Con tal motivo Mouriño acaba de remitir unha carta á Subdirección Xeral de Operadores de Telecomunicacións e Infraestruturas Dixitais onde lembra que “o pasado mes de maio o Ministerio de Asuntos Económicos e Transformación Dixital iniciou unha consulta pública para determinar zonas brancas e grises partindo dunhas zonas elegibles de forma provisional , onde comprobamos no mapa georreferenciado que había zonas do noso municipio onde non existen vivendas , por todo iso realizamos alegacións no prazo correspondente”.
Posteriormente, revisando as zonas elegibles definitivas, o Concello de Sada puido comprobar “que non se incluíron moitas zonas do noso municipio onde existe gran carencia de cobertura”.
Como continuación ás comunicacións enviadas e como xa se adiantou, no Concello de Sada realizouse unha consulta pública para detectar as zonas carentes de cobertura de fibra no municipio “coa intención de que sexa estudada a inclusión das devanditas zonas nos próximos plans de despregamento”.
“Somos coñecedores, indica rebeca Mouriño, da complexidade da realización dos plans de despregamento e o noso obxectivo non é outro que achegar a información real para poder facilitar a detección destes puntos, por iso achegámoslles as referencias catastrais das vivendas e a zona na que se atopan”.