A concellaría de Cultura programa durante o mes de maio na Casa da Cultura a exposición "Máis que abellas. Polinizadores e flores, a vida en xogo" producida polo Museo de Ciencias Naturais de Barcelona. A mostra é un escaparate da vida das abellas silvestres, pero tamén representa unha oportunidade para entender o papel que exercen estes insectos, xunto cos seus hóspedes, as plantas, no equilibrio ecolóxico do planeta.
O declive de polinizadores en todos os continentes pon en risco a supervivencia das especies vexetais, a sustentabilidade da agricultura e a vida humana. Nove de cada dez plantas necesitan un insecto para dar froitos e sementes, e calcúlase que o 75 % dos alimentos que se producen en todo o mundo dependen da polinización por insectos.
Ante esta situación, o Jardí Botànic de Barcelona, co apoio das administracións públicas europea, estatal, autonómica e municipal, creou esta exposición co obxectivo de dar a coñecer e sensibilizar á cidadanía sobre o papel esencial dospolinizadores, en especial, das abellas silvestres, para garantir a supervivencia de boa parte de plantas do planeta Terra. A maioría de nós coñecemos as abellas do mel, pero estas son só unha especie entre outras moitas. Na península Ibérica hai ao redor dun milleiro de especies de abellas solitarias que non viven en colmeas nin producen mel, pero elas son as verdadeiras protagonistas da polinización e, tamén, desta exposición.
Cunha formulación museográfico visual e pedagóxico con varios niveis de lectura, para chegar tanto ao público escolar como ao científico, recréase a vida natural das abellas para mostrar como se dá a polinización e como se relacionan as flores e estes insectos, así como o papel que xogan no equilibrio ecolóxico da Terra. A continuación, repásanse as principais causas da diminución constante de insectos polinizadores: o uso de praguicidas, a fragmentación e perda de hábitat, a contaminación ambiental ou o cambio climático.
Proponse recomendacións prácticas que calquera persoa pode seguir co obxectivo de cambiar esta situación como, por exemplo, exercer un consumo responsable, adornar balcóns e terrazas con plantas aromáticas para as especies locais de polinizadores ou construír hoteis de abellas, entre outros. A mostra inclúe, tamén, varias iniciativas ambientais promovidas por entidades e asociacións, e, tamén, polas administracións públicas europeas, estatais, autonómicas e locais. Ademais, o proxecto inclúe un programa de actividades dirixido a todos os públicos.